भीमदत्तनगर । निर्मला पन्तको बलात्कार र हत्या पछि चर्चिकिएको कञ्चनपुरको भीमदत्तनगरको आन्दोलन नियन्त्रणमा लिन लगाइएको कर्फ्यु केही खुकुलो पारिएको छ। आइतबार बेलुकी ६ बजेदेखि राति १० बजेसम्म कर्फ्यु खुलाइएको थियो भने सोमबार बिहान ५ देखि दिउँसो १२ बजेसम्म कर्फ्यु हटाइएको हो।
जिल्ला प्रशासन कार्यालयमा बसेको जिल्ला सुरक्षा समितिको बैठकले कफ्र्युको समय तालिका फेरबदल गरेको जिल्ला सुरक्षा समितिका एक सदस्यले जानकारी दिए। शुक्रबार राति ८ बजेदेखि स्थिति सामान्यरुपमा ल्याउन र शान्तिसुरक्षा खलबलिन नदिन कर्फ्यु लगाउन थालिएको हो।
छानबिन टोली अनुगमनमा
निर्मला पन्तको हत्याबारे छानबिन गर्न गठित उच्चस्तरीय छानबिन समितिले बालिकाको शव भेटिएको उखुबारीको अनुगमन गरेको छ। दुई दिनअघि छानविनका लागि यहाँ आइपुगेको गृहमन्त्रालयका सहसचिव हरिप्रसाद मैनाली नेतृत्वको पाँच सदस्यीय टोलीले निर्मलाको शव भेटिएको उखुबारी, निर्मला स्कूलको गृहकार्य गर्न गएका साथी रोशनी बमको घर र निर्मलाको घरसमेत अनुगमन गरेको छ।
टोली यहाँ आइपुगेकै समयमा जिल्ला प्रहरी कार्यालय कञ्चनपुरले निर्मलाका साथी रोशनी र उनकी दिदी बबिता बमलाई अनुसन्धानका लागि नियन्त्रणमा लिइएको छ।
