सुजन काफ्ले
दोलखा। दोलखा जिल्ला भाद्र ६ गते सम्म लकडाउन हुने भएको छ।
जिल्लामा कोरोना भाईरसबाट संक्रमित हुनेहरुको सङ्ख्या दिनप्रतिदिन बढ्दै गए पछि
जिल्ला संकट व्यवस्थापन समितिको शुक्रबार बसेको बैठकले शुक्रबार रातको १२ बजे बाट भाद्र ६ गते सम्म लकडाउन गर्ने निर्णय गरेको हो
शुक्रबार गौरिशंकर गाउँपालिकामा थप ५ जनामा कोरोना संक्रमण पुष्टि भएको थियो । मंगलरबार कोरोना पुष्टि भएका २ जनाको सम्पर्कमा गएका ८३ जनाको स्वाव परिक्षणका क्रममा आज शुक्रबार ४ पुरुष सहित एक महिलामा कोरोना पुष्टि भएको हो।
४ दिनको अवधिमा दोलखामा ८ जनामा कोरोना संक्रमण पुष्टि भए सँगै लकडाउन घोषणा गरिएको हो । अहिले सम्म जिल्लाको गौरीशंकर गाउँपलिका ७ जना र कालिन्चोक गाउँपालिकाको १ जनालाइ कोरोना पोजिटिभ देखिएको छ।बिहिबार कालिञ्चोक गाउँपालिकामा भारतबाट आएका एक पुरुषमा कोरोना संक्रमण पुष्टि भएको थियो ।
जिल्ला प्रशासनले आज सुचना जारी गर्दै लकडाउनको अवधिमा अत्यावश्यक काममा बाहेक घर बाहिर निस्कन तथा हिडडुलमा पुर्ण रुपमा निषेध गरेको छ ।
त्यसैगरि अत्यावश्यक सेवा प्रदान गर्ने कार्यालय बाहेक सबै सरकारी तथा गैह्रसरकारी कार्यालयहरु बन्द हुनेछ । जिल्लाभर सबै प्रकारका सवारी साधन सञ्चालनमा रोक साथै जिल्लाभरका बजार पसल पुर्णरुपमा बन्द गर्ने निर्णय गरिएको छ ।
अत्यावश्यक वस्तु विक्री गर्ने पसलहरु खाद्यान्न तरकारी, दुग्ध पदार्थ बिहान १० बजे सम्म खुल्ला रहने दोलखाका प्रमुख जिल्ला अधिकारी भीमकान्त शर्माले जानकारी दिए
