अग्रमोर्चामा खटिनेको हौसला बढाउनु सबैको दायित्व हो

नेपाल खेलकुद महासंघका बरिष्ठ उपाध्यक्ष तथा ‘नेकोसको आह्वान, कोभिड– नो भिड’ राष्ट्रिय अभियानका संयोजक पर्शुराम बस्नेतसँग कोशी सन्देशका कार्यकारी सम्पादक सुदिप कोइरालाले गरेको कुराकानीको सम्पादित अंश :

नेपाल खेलकुद महासंघले अहिले चलाईरहेको ‘कोभिड नो–भीड’ अभियान के हो ?

खेलकुद महासंघले सञ्चालन गरेको ‘कोभिड नो–भीड’ अभियान अहिलेको कोरोना महामारीले पारेको प्रभाव र त्यसको न्यूनीकरणका लागि स्वयंसेवा अभियान हो । यो महामारीविरुद्ध अग्रमोर्चामा काम गरिरहेका स्वास्थ्यकर्मी, सुरक्षाकर्मी, सञ्चारकर्मी, राष्ट्र सेवक कर्मचारीलगायतका साथमा खेलकुद महासंघ पनि छ । अर्थात् कोरोना महामारीविरुद्धको अभियानमा खेलकुद महासंघ पनि अग्रमोर्चामा नै रहेर अग्रभागमा काम गर्नेहरुको प्रोत्साहन गर्नुपर्छ भन्दै यो अभियान सञ्चालन गरिएको हो । अग्रमोर्चामा खटिनेको हौसला बढाउनु यतिबेला सबैको दायित्व हो । हामीले त्यो दायित्व पूरा गरिरहेका छौं
यस अभियानअन्तर्गत अग्रमोर्चामा काम गर्नेहरुलाई महासंघले स्वास्थ्य सुरक्षा सामग्री प्रदान गर्नुका साथै जनचेतना फैलाएर सघाउने काम गरिरहेको छ । अग्रमोर्चामा आफ्नो जिउ ज्यानको प्रवाह नगरी खटेकाहरुसँग हामी पनि अग्रमोर्चा रहेर सघाउन राष्ट्रिय अभियान सञ्चालन गर्दै आएका छौं । यो विशेष अभियान ७ वटै प्रदेशको ७७ जिल्लास्थित ७ सय ५३ पालिकासम्म सञ्चालन गरेर स्वयंसेवा गर्न खेलकुद महासंघका नेता तथा कार्यकर्तालाई परिचालनका साथै पहिलो चरणमा स्वास्थ्य सामग्री बितरण अभियान सञ्चालन गरेका छौं । अहिलेसम्ममा ५६ वटा जिल्लामा यो अभियान पुर्‍याइसकेका छौं ।

तपाइँले यतिका जिल्लाहरु पुग्दा अग्रमोर्चामा खटिएकाहरुलाई के कस्ता समस्या देख्नु भयो ?

यी जिल्लाहरुका सञ्चारकर्मी, सुरक्षाकर्मी र खेलकर्मीहरुसम्म पुग्यौं । सुरक्षाकर्मीहरुलाई स्वास्थ्य सुरक्षा सामग्री अभाव देख्यौं । सुरक्षाकर्मीहरुले एउटै मास्क ३–४ पटकसम्म धोएर लगाएको पनि पाइयो । त्यसैले हामीले सुरक्षाकर्मीहरुलाई पहिलो प्राथमिकतामा राखेर स्वास्थ्य सामग्री बितरण गरिरहेका छौं । एउटा जिल्ला प्रहरी कार्यालयलाई कम्तिमा एक महिना पुग्ने मास्क, सेनिटाइजर, ग्लोब्स, फेसशिल्ड बितरण गर्दै आएका छौं । यसले उहाँहरु प्रोत्साहित हुनुभएको छ । सरकारले तोकेका स्वास्थ्य सुरक्षाका मापदण्ड कार्यान्वयन गर्न सुरक्षाकर्मी नै खटिनुपर्ने, कोरोना महामारीको बारेमा सन्देश प्रवाह गर्न सञ्चारकर्मी खटिएका देख्यौं । अझै लामो निषेधाज्ञा लम्बियो भने खाद्य सामग्रीको अभाव हुन सकछ । त्यसैले आवश्यकतालाई मध्य नजर गर्दै खाद्यसामग्री पनि बितरण गर्ने तयारीमा जुटेका छौं । यसका साथै अझै महामारी भयावह रुप लिँदै गए खेलकुद क्षेत्रका कभर्ड हल, तालिम केन्द्रलगायतका संरचनालाई आइसोलेसन सेन्टर तथा आकस्मिक अस्पताल बनाउनुपर्छ भनेर लबिङ गर्ने र कार्ययोजना बनाउने काम भइरहेको छ ।

कोरानाले खेलाडीहरुलाई कत्तिको प्रभावित बनाएको छ ? उहाँहरुको मनोभाव के छ ?

यो महामारीले खेल क्षेत्र प्रभावित नहुने कुरै भएन । त्यो प्रभावित भएकै छ । कोरोना महामारीले खेलकुद महासंघका केन्द्रिय सदस्यहरु पनि हामीले गुमाएका छौं । यसले समग्र खेलकुद क्षेत्रका साथै मुलुकलाई अपूरणीय क्षति पुगेको छ । यो शोकलाई शक्तिमा बदल्दै मुलुकभरिका खेलकुदसँग आबद्ध व्यक्तिहरुका साथै सम्पूर्ण खेलाडीहरु कोरोना महामारीविरुद्धको यो अभियानमा लागेका छन् । हाम्रा प्रधानमन्त्री केपी शर्मा ओली नेतृत्वको सरकारले खेलकुद क्षेत्रलाई अभिभावकत्व प्रदान गर्नु भएको छ । उहाँले खेलकुदलाई प्राथमिकतामा राखेर खेलाडीहरुलाई प्रोत्साहित गर्दै मनोबल बढाइरहनु भएको छ । अब अगामी वर्षको बजेटमा यस क्षेत्रलाई सरकारले प्राथमिकतामा राखेर बजेट ल्याउनेमा सबै आशावादी छन् । खेलकुद क्षेत्र अनुशासित भएको र खेलाडीहरुले खेलेरै मुलुकलाई संसारभरि चिनाइरहनु भएकाले यसलाई सरकारले प्राथमिकतामा राख्नुपर्छ । पछिल्लो समय सुरु भएको अन्तर्राष्ट्रिय खेलहरुले मुलुकमा संसारभरिका खेलाडीहरुलाई ल्याएर खेल टुरिजमको समेत विकासको शुभारम्भ भइसकेकाले यो क्षेत्र सरकारको प्राथमिकतामा नपर्ने कुरै भएन । त्यसैले सरकारले यस क्षेत्रलाई निरास नपार्नेमा हामी विश्वस्त छौं ।

कोरोना संक्रमणका कारण लामो समयदेखि तल्लोस्तरसम्म नै खेलकुद गतिविधि शून्य झै बनेको छ । अहिले खेलकुद क्षेत्र पनि व्यवसायिक भएको अबस्थामा खेलेरै जीवनायापन गर्ने खेलाडीहरु पनि छन् । यो महामारीले उहाँहरुको दैनिक जीवनयापन कतिको प्रभावित बनाएको छ ? उहाँहरुको बिषयमा केही सोच्नु भएको छ ?

अवश्य पनि सोचिएको छ । यसका लागि हामीले हेल्प डेस्क नै निर्माण गरेर काम अघि बढाएका छौं । हेल्प डेस्कले कोरोना महामारीले ज्यान गुमाएका र समस्यामा वा ओझेलमा परेका खेलकुद क्षेत्रका व्यक्तिहरुको तथ्यांक संकलनको काम गरिरहेको छ । तथ्यांक संकलनपछि सबै पिडित भएकाहरुको सहयोग तथा उद्धारका लागि योजनाबद्ध रुपमा कार्यक्रम ल्याउने तयारीमा छौं ।
अब खेलकुद गतिविधिको कुरा गर्ने हो भने, प्रदेश १ कै खेलकुद क्षेत्रको कुरा गरौं न । तीन वर्षदेखि खेलकुद क्षेत्र नेतृत्वविहिन अवस्थामा छ । प्रदेश खेलकुद बोर्ड गठन हुन नसकिरहेको अवस्थामा खेल गतिविधि नहुनु, बजेट फ्रिज हुनु स्वभाविक हो । सातै प्रदेशमा खेलकुदमा लागेकाहरु अभिभावक नपाउँदा निराश छन् । त्यसैले संघीय तथा प्रदेश सरकारलाई ध्यानाकर्षण गराएर खेलकुद क्षेत्रलाई जिल्ला तहसम्म नेतृत्व प्रदान गर्न पहल गरिरहेका छौं । नेतृत्व चयन भएपछि स्वभाविक रुपमा खेल क्षेत्रले गति लिन्छ ।

तपाइँहरुले अहिले सञ्चालन गरिरहनु भएको अभियान एक पटकका लागि मात्रै हो की निरन्तर चलिरहन्छ ?

यो अभियान आवश्यकताले सृजना गरेको अभियान हो । त्यसैले कोरोना महामारीभरि चलनाउँछौं । त्यसपछि आवश्यकताका आधारमा खेलकुद महासंघहरुले रचनात्मक काम गर्दै अघि बढ्छ । अहिले यो महामारीविरुद्ध लडिरहँदा खेलकुद महासंघले पनि फ्रन्टलाईनमा उभिएर केही गर्नुपर्छ भनेर यो राष्ट्रिय अभियान चलाइएको हो । खेलकुद महासंघको संरचना नगर तहसम्म नै छन् । त्यसैले राष्ट्रिय अभियानसँगै जिल्ला/जिल्लाका तल्लो तहसम्म यो अभियानलाई सञ्चालन गरिरहेको अवस्था छ । अभियानका क्रममा संक्रमितको घरमा सेनिटाइज गर्ने, संक्रमण भएर मृत्यु भएकाहरुको शव व्यवस्थापन गर्ने, सचेतनामूलक अभियान सञ्चालन गर्नेलगायतका कामहरु भइरहेको छ । त्यसको अनुगमन तथा तथ्यांक राख्ने काम पनि भइरहेको छ ।

कोरोना महामारीको नियन्त्रणका लागि के गर्न आवश्यक देखिन्छ ?

तराईका जिल्ला कोरोना महामारीले धेरै प्रभावित भएका पायौं । सर्लाहीमा पुग्दा एकै दिन १८ जनासम्मको दुःखद निधन भएको पायौं । यसको नियन्त्रणका लागि सरकारले तोकेको स्वास्थ्य सुरक्षा मापदण्ड सबैले कडाईका साथ पालना गर्ने, सामाजिक दुरी कायम गर्ने, मास्क लगाउने, सेनिटाइजर लगाउने, अनावश्यक घर बाहिर ननिस्किने जस्ता सावधानी अपनाउनु अपरिहार्य छ । जहाँ बढी भिडभाड, जहाँ निषेधाज्ञा उलंघन भएको छ, त्यहाँ संक्रमण बढी फैलिएको देखिन्छ । जहाँ सचेतता अपनाइएको छ, त्यहाँ अत्यन्तै कम संक्रमण फैलिएको पायौं । त्यसैले साबधानी अपनाउनुका साथै पोषिलो खाने कुरा नियमित खाने र कोरोना महामारीलाई पराजित गर्न रोग प्रतिरोधात्मक क्षमता बढाउनुको विकल्प छैन ।

Back to top button