जनसचेतन सहकारीले १०५ जना विद्यार्थीलाई छात्रवृत्ति दिने

चरीकोट, भदौ २८ गते
दोलखाको वैत्यश्वर गाउँपालिका –५ मैनापोखरीमा मुख्य कार्यालय रहेको जनसचेतन बचत तथा ऋण सहकारी संस्थाले १०५ जना विद्यार्थीलाई छात्रवृत्ति दिने भएको छ । संस्थाको आव ०७९/८० को वार्षिक कार्ययोजना अनुसार छात्रवृत्ति दिन लागिएको संस्थाले जनाएको छ ।
संस्थाले एक सुचना जारी गर्दै संस्थाले जारी गरेका आधारहरु पूरा गरेर विद्यालय बाट सिफारिस भएका विद्यार्थीहरुलाई छात्रवृत्ति प्रदान गरिने संस्थाका अध्यक्ष हेमन्त चौलागाईंले बताउनुभयो । संस्थाका अनुसार सामुदायिक विद्यालय तथा क्याम्पमा अध्ययनरत १ सय भन्दा कम विद्याथी भएका विद्यालयका २ जना, १ सय देखि २ सय सम्म विद्यार्थी भएका विद्यालयका ४ जना, २ सय भन्दा माथी विद्यार्थी भएका विद्यालयका ६ जना विद्यार्थीहरुलाई विद्यालयले सिफारिस गर्नुपर्ने छ ।
त्यसैगरी संस्थाले आधारभुत तहका ५० जना विद्यार्थीलाई १ हजार ५ सयका दरले, माध्यामिक तह (९–१०)का ३० जना विद्यार्थीलाई २ हजार ५ सयका दरले ३० जनालाई , माध्यामिक तह (११–१२) का २० जना विद्यार्थीलाई ३ हजार ५ सयका दरले र क्याम्पस तहमा अध्ययनरत ५ जना विद्यार्थीलाई ७ हजारका दरले छात्रवृत्ति दिइने संस्थाका अध्यक्ष चौलागाईंले बताउनुभयो । विद्यालय बाट सिफारिस भएर आएका मध्येबाट सबै तहमा अध्ययन गर्ने १०५ जना विद्यार्थीलाई छात्रवृत्ति दिइने छ । जेहेन्दार र दलित विद्यार्थीलाई विशेष प्राथमिकता दिइने संस्थाले जनाएको छ । छात्रवृत्ति पाउनका लागि संस्थाका सदस्य वा सदस्यका छोराछोरी हुनु पर्ने छ । विद्यालयले सिफारिस गरेका विद्यार्थीको नाम सहित शैक्षिकसत्र ०७८ को मार्कसिट वा ग्रेडसिट र सस्थाले जारी गरे अनुसारको सिफारिस पत्र उपलब्ध गराउनुपर्ने संस्थाले जनाएको छ । आजका विद्यार्थी भोलिका देशका कर्णाधार रहेकाले विद्यार्थीहरुको पठनपाठन गर्नका लागि सहज होस भन्ने उदेश्यले छात्रवृत्ति दिन लागिएको अध्यक्ष चौलागाईंले बताउनुभयो । उहाँले भन्नुभयो विद्यार्थीहरुलाइ थोरै भएपनि सहयोग पुगोस भन्ने संस्थाको उदेश्य हो। शिक्षा क्षेत्रको विकासमा विभिन्न कार्यक्रम गर्ने योजना रहेको छ । दोलखा, काभ्रेपलान्चोक, काठमाडौ ,भक्तपुर, र ललितपुर गरेर ५ जिल्लामा कार्यक्षेत्र रहेको संस्थाको मुख्य कार्यालय दोलखाको मैनापोखरीमा रहेको छ । कुल शेयर सदस्य सङ्ख्या ३६ हजार ३९४ पुगेको छ भने संस्थाको कुल सम्पती २ अरब ३० करोड रहेको छ । २०५० सालमा स्थापना गरिएको संस्था दोलखाकै सबैभन्दा ठूलो सहकारी संस्था हो ।     

Back to top button