विराटनगर । उपचारका लागि विराटनगरका विभिन्न अस्पतालहरुमा आउने विरामी र विरामीका आफन्तलाई गलत सुचना दिएर ठगि गर्ने दुई जनालाई मोरङ प्रहरीले पक्राउ गरेको छ ।
विरामीले बताएको अस्पतालबारे गलत जानकारी दिई आफुले चाहेको अस्पताल वा क्लिनकमा लैजाने र ठगी गर्ने कार्यमा संलग्न रहेका विचौलिया विराटनगर ८ का बर्ष १८ को प्रधुम्न राय र २३ बर्षीय आनन्द कुमार साह प्रहरीले पक्राउ गरेको हो ।
उनिहरुलाई हिजो पक्राउ गरी थप अनुसन्धान गरीरहेको मोरङ प्रहरी प्रबक्ता प्रहरी नायव उपरिक्षक दिपक श्रेष्ठले बताउनुभयो ।
उहाँले उनिहरुले विरामीले जान चाहेको अस्पतालमा कोरोना धेरै छ, उपचार राम्रो छैन भन्ने जस्ता अफवाह फैलाएको र सम्पर्कमा भएको फार्मेसीमा औषधी किन्न वाध्य गराउने गरेको पाइएकोले पक्राउ गरीएको बताउनुभयो ।
यस्ता विचौलीयाहरुले बस स्टेनमा विरामी उत्रने वितिकै हात समाएर तान्ने र विरामीको इच्छा अनुसारकै अस्पताल पुर्याइदिने भन्दै आफुले कमीसन पाउने अस्पताल वा क्लिनिक पुर्याउने गरेका छन ।
प्रहरीले यस्तो किसिमको ब्यवहारबाट कोही पनि पीडित भए प्रहरीमा उजुरी गर्न आग्रह गरेको छ ।
