​चरिकोट । दोलखामा स्रोत नखुलेको करिब २० लाख रुपैयाँसहित दुई जना पक्राउ परेका छन ।

जिल्लाको भिमेश्वर नगरपालिका – ७ मकैबारीबाट प्रहरीले स्रोत नखुलेको ठुलो परिमाणको नगदसहित दुई जनालाई पक्राउ गरेको हो।

सदरमुकाम चरिकोटको सातदोबाटो चोकबाट करिब ५ किलोमिटर पश्चिम सडक आसपासको क्षेत्रमा शंकास्पद रूपमा झोला बोकी हिँडिरहेको अवस्थामा उनीहरूलाई फेला पारिएको प्रहरीले जनाएको छ।

​पक्राउ पर्नेहरूमा लमजुङको सुन्दरबजार नगरपालिका-२ स्थायी घर भई हाल ललितपुर बस्ने ३८ वर्षीय रामचन्द्र शर्मा र झापाको मेचीनगर नगरपालिका-७ घर भई हाल भक्तपुर बस्ने ४२ वर्षीय शेर बहादुर राउत रहेका छन्। प्रहरीले उनीहरूको खानतलासी गर्दा झोलाभित्र लुकाइराखेको अवस्थामा १९ लाख ९२ हजार ५ सय रुपैयाँ बरामद गरेको छ।

​उक्त रकमको स्रोत र प्राप्तिको सम्बन्धमा सोधपुछ गर्दा निजहरूले स्पष्ट खुलाउन नसकेपछि प्रहरीले दुवै जनालाई रकमसहित नियन्त्रणमा लिएको जिल्ला प्रहरी कार्यालय दोलखाका सूचना अधिकारी श्रीराम तिमल्सिनाले बताउनुभयो ।

 पक्राउ परेका दुवैमाथि मुलुकी फौजदारी संहिता, २०७४ अन्तर्गत “हुण्डी सम्बन्धी कारोबार गर्न नहुने” कसूरमा जिल्ला अदालत दोलखाबाट म्याद थप गरी अनुसन्धान प्रक्रिया अगाडि बढाइएको प्रहरीले जनाएको छ।