सुर्खेत, माघ ११ गते । नेपाली कांग्रेसका युवा नेता कुन्दनराज काफ्लेले पार्टीभित्रका आन्तरिक मनमुटाव र विगतका तित्ततालाई बिर्सेर आगामी निर्वाचनमा पार्टीलाई जिताउन एकजुट हुन आह्वान गर्नुभएको छ।

​’हामी कांग्रेसी एक छौँ’ भन्ने बलियो सन्देश प्रवाह गर्ने लक्ष्यसहित पश्चिम नेपालको साङ्गठनिक यात्रामा निस्कनुभएका नेता काफ्लेले आइतबार सुर्खेतमा कार्यकर्ताहरूसँग भेटघाट गर्दै यस्तो बताउनुभएको हो। रुख चिन्ह र चार तारा झण्डामुनि सबै लोकतन्त्रवादीहरू गोलबन्द हुनुपर्नेमा उहाँले जोड दिनुभयो।

​विगत बिर्सौँ, भविष्य निर्माण गरौँ

​सुर्खेतमा आयोजित कार्यकर्ता भेटघाट कार्यक्रमलाई सम्बोधन गर्दै नेता काफ्लेले भन्नुभयो, “हिजो के भयो, त्यो कुरा छोडिदिनुहोस्। आज हामीले के गर्ने र भोलिको कांग्रेसलाई अझ जिम्मेवार र शक्तिशाली कसरी बनाउने भन्ने नै हाम्रो मुख्य जिम्मेवारी हो।” उहाँले चुनावी मैदानमा रहेका पार्टीका उम्मेदवारहरूलाई उच्च मनोबलका साथ साथ, सपोर्ट र हौसला दिन सबै तहका नेता-कार्यकर्ताहरूलाई आग्रह गर्नुभयो। निर्वाचनमा जित निकाल्न आन्तरिक एकता नै पहिलो सर्त भएको उहाँको भनाइ थियो।

​पश्चिम नेपाल यात्रा जारी

​सुर्खेतका कांग्रेसजनहरूसँगको भेटघाट र उत्साहजनक सहभागिताप्रति धन्यवाद व्यक्त गर्दै काफ्लेले आफ्नो पश्चिम नेपालको यात्रा जारी रहने जानकारी दिनुभयो। पार्टीभित्र एकताको ऊर्जा भर्न र चुनावी माहोललाई ‘कांग्रेसमय’ बनाउन यो यात्रा फलदायी हुने विश्वास लिइएको छ।

​सामाजिक सञ्जालमार्फत आफ्नो धारणा सार्वजनिक गर्दै उहाँले अपिल गर्नुभएको छ– “आउनुस्, सबै डेमोक्रेटहरू लाम लागौँ र कांग्रेसलाई सशक्त बनाऔँ।”

​पार्टीभित्रको गुटबन्दी र असन्तुष्टि चिर्दै स्थानीय स्तरसम्म पुग्ने काफ्लेको यो अभियानलाई कांग्रेस वृत्तमा अर्थपूर्ण रूपमा हेरिएको छ। सुर्खेतपछि उहाँको यात्रा पश्चिमका अन्य जिल्लातर्फ अघि बढ्नेछ।