​दोलखा । तामाकोशी गाउँपालिका वडा नं. ४ मालुस्थित गुप्तेश्वर माध्यमिक विद्यालयले विजया दशमी, शुभ दीपावली तथा छठ पर्वको अवसरमा शुभकामना आदानप्रदान कार्यक्रम सम्पन्न गरेको छ।
​विद्यालय व्यवस्थापन समितिका अध्यक्ष मोहननाथ योगी ‘जगदीश’ को कुशल नेतृत्वमा गुप्तेश्वर माविलाई शैक्षिक तथा भौतिक रूपमा अझ चलायमान, उत्कृष्ट र व्यवस्थित बनाउने अभियान तीव्र रूपमा अघि बढाइएको छ। कार्यक्रममा बोल्दै कार्यवाहक वडा अध्यक्ष यज्ञ श्रेष्ठले गुप्तेश्वर माविको शैक्षिक विकास र रूपान्तरणका लागि वडा कार्यालय निरन्तर सहकार्य गर्न प्रतिबद्ध रहेको बताउनुभयो।

सोही कार्यक्रमका बीच तामाकोशी-४ मा जन्म भई हाल अमेरिकालाई कर्मथलो बनाउनुभएका बुद्धिजिवी, समाजसेवी तथा सहयोगी मनका धनी दुई भाइ— पुष्कर रोका र पुष्कर पोखरेलको सौजन्यमा विद्यालयमा अध्ययनरत विद्यार्थीहरूलाई शैक्षिक सामग्री वितरण गरिएको छ।
​नेपालमा रहनुभएका उहाँहरूका बुबा रामबहादुर रोका, बुबा शिवबहादुर पोखरेल र राजन पोखरेलले प्रतिनिधित्व गर्दै विद्यार्थीहरूलाई ब्याग (झोला) तथा स्टेसनरी सामग्रीहरू हस्तान्तरण गर्नुभएको थियो।

​कार्यक्रममा अध्यक्ष मोहननाथ योगी ‘जगदीश’ सहित गुप्तेश्वर विद्यालय परिवारले सहयोगी दाजुभाइ पुष्कर रोका र पुष्कर पोखरेलको उत्तरोत्तर प्रगति, सुस्वास्थ्य र दीर्घायुको कामना गर्दै उहाँहरूसहित देश-विदेशमा रहनुहुने सम्पूर्ण नेपालीहरूमा विजया दशमी, दीपावली र छठ पर्वको हार्दिक मङ्गलमय शुभकामना व्यक्त गरेको छ।