चरीकोट, दोलखा । एपेक्स स्कुलमा आज आयोजित ‘एपेक्स भोइसेस’ (भाग १) कार्यक्रममा दोलखाका प्रतिष्ठित व्यक्तित्व डा. विनोद दंगालले विद्यार्थीहरूलाई आफ्नो जीवनका संघर्ष, मेहनत र सफलताका प्रेरणादायी अनुभवहरू सुनाउनुभएको छ।

कार्यक्रममा बोल्दै डा. दंगालले विद्यार्थी जीवनमा आउने साना-ठूला चुनौतीहरूलाई कसरी सामना गर्ने र प्रतिकूल परिस्थितिमा पनि कहिल्यै हार नमानी अघि बढ्ने सकारात्मक सोच कसरी विकास गर्ने भन्ने विषयमा आफ्ना धारणा राख्नुभयो।

उहाँले सपना देख्नु मात्र ठूलो कुरा नभएको उल्लेख गर्दै, ती सपनालाई साकार पार्न निरन्तरको मेहनत र दृढ संकल्पको आवश्यकता पर्नेमा जोड दिनुभयो।

“जीवनमा कठिनाइहरू आउँछन्, तर ती नै हाम्रा सिक्ने अवसर हुन्,” उहाँले भन्नुभयो, “सफलताका लागि कुनै ‘सर्टकट’ हुँदैन, केबल निरन्तरको प्रयास र आत्मविश्वासले मात्र हामीलाई गन्तव्यमा पुर्‍याउँछ।”

विद्यालयले सुरु गरेको ‘एपेक्स भोइसेस’ को पहिलो श्रृङ्खलामा डा. दंगालको प्रस्तुति विद्यार्थीहरूका लागि अत्यन्तै फलदायी बनेको थियो। कार्यक्रम केवल एक औपचारिक भाषणमा मात्र सीमित नभई विद्यार्थीहरूका लागि आत्मविश्वास बढाउने र भविष्यप्रति सकारात्मक दृष्टिकोण निर्माण गर्ने विशेष अवसर बनेको सहभागी विद्यार्थीहरूले बताए।

​एपेक्स स्कुल परिवारले डा. दंगाललाई उहाँको अमूल्य समय र विद्यार्थीहरूलाई प्रदान गर्नुभएको ऊर्जा एवं प्रेरणाका लागि विशेष धन्यवाद ज्ञापन गरेको छ। उक्त कार्यक्रममा विद्यालयका शिक्षक, कर्मचारी र ठूलो संख्यामा विद्यार्थीहरूको उपस्थिति रहेको थियो।